Góðan daginn!!

Góðan daginn gott fólk. Í dag er mánudagurinn 10. apríl og klukkan er 08.34. Ég er búin að hengja upp og setja í þvottavéla og hvað er svona undarlegt við það? Jú ÞETTA ER FYRSTI DAGURINN Í PÁSKAFRÍINU MÍNU og hvern fjandann er ég nú að gera vakandi.

Annað hvort er ég orðin svona gömul (sem er gjörsamlega út úr korti) eða það er birtan (sem hefur ekki stoppað mig hingað til) já eða sakna þess svo að vera ekki að kenna eins og ég ætti að öllu jöfnu að gera á mánudagsmorgni (humm nei mjög gott að fá frí af og til) og þá er ég að verða uppiskroppa með útskýringar. Kemur í ljós hvað gerist í fyrramálið.

Átti annars voðalega rólega og notalega helgi heima í faðmi fjölskyldunnar. Prjónaði alveg helling, því nú á sko að taka á því (.... síðan hvenær er að prjóna flokkað undir að taka á því) OMG ég veit ekki hvað er hlaupið í mig.

En allavega - ég er einhver mesti sérfræðingur í að byrja að prjóna hitt og þetta og svo dettur mér eitthvað annað í hug á já já þá er hitt bara sett á hold í svona 2-3 ár eða bara aldrei klárað. Mig langar SVO MIKIÐ í aðra lopapeysu og þótt amma sé svona 365 sinnum fljótari að gera hana en ég, þá ætla ég fjandakornið að þrjóskast til að gera hana sjálf í þetta skiptið þótt það muni taka mig heila eilífð!!!

EEEN ég lofaði sjálfri mér að fyrst skildi ég vinna upp eitthvað af þessum ókláruðu verkum mínum og svei mér þá ef ég er ekki að standa við orð mín. Kláraði að prjóna og þæfa eina ókláruðu töskuna og spurning um að klára næst ehemm það sem ég byrjaði á í verkfallinu í október 2004!! (eða var það nóv.?)

EN TIL HAMINGJU ÞIÐ SEM ERUÐ ENNÞÁ AÐ LESA ÞVÍ NÚ ER ÉG BÚIN AÐ TALA UM PRJÓNIÐ MITT Í 166 ORÐUM!! Aldeilis spennandi það, allir sveittir af spenningi...

Ég vaknaði upp með andfælum við einhver læti í nótt. Maður hugsar nú ekkert endilega neitt sérlega rökrétt svona um miðja nótt og fór ég mikið að spá í hvað hefði gerst? Datt í hug jarðskjálfti, álfkonur og geimverur en ákvað að bíða með málið til morguns og spá betur þá því ég vissi að þá yrði líklegra að ég kæmist að gáfulegri niðurstöðu. Eins og venjulega áttu hlutirnir sér eðlilegar útskýringar því rannsókn morgunsins leiddi í ljós að snjóþotan hennar Hallbjargar hafði fokið í rúðuna.

ÉG gleymi seint þegar hann Fróði gisti hjá okkur múttu. Hann svaf á dýnu við hliðiná rúminu hans Heimis og segir okkur mæðgum frá því að undir rúminu sé grænt skrímsli. Hann var ótrúlega sannfærandi EENN var ekki að kaupa þetta svo ég fór hugrökk í málið. Þegar ég leit undir rúm leist mér ekkert betur en honum á blikuna því þarna var grænt skrímsli (reyndar dáldið kunnuglegt)!! Dáldið treg ákvað ég nú samt að kanna málið frekar og þegar öll kurl voru komin til grafar voru staðreyndirnar þær að á gólfinu var mynd í ramma af grænu skrímsli og rammanum stillt upp við vegg. Beint fyrir neðan myndina var fjöltengi með ljósi og útkoman varð þessi líka fína speglun af óargardýrinu undir rúminu.

Jæja kveð að sinni ... Þangað til næst, lifið heil!!